Juma Ka Din: Ek Mubarak Aur Khaas Din

Ijtemaai Ibadat Aur Zikr-e-Ilahi Ki Ahmiyat

Juma ka din Islam mein ek khaas ahmiyat aur fazilat ka haamil hai. Ye din musalmanon ke liye ijtimaai ibadat, zikr-e-Ilahi, aur deen ke ahkam par ghour o fikr ka moqa fara-ham karta hai. Juma ke-din gusl karna, waqt par masjid pahunchna, aur khutba-e-Juma sunna Nabi Akram sallallahu-alaihi-wasallam ki taleemat se sabit hain aur ye a’maal be-shumar barakaat aur ajar o sawab ka zariya hain.

Ahadees-e-Mubarakah mein Juma-ke-din ki ahmiyat, is din ki ibadat ke fazail, aur jaldi masjid jane walon ke liye darjaat o ina’maat ka tafsili zikar kiya gaya hai. Ek hadees-e-mubarak ke mutabiq Juma ke din jaldi masjid jane walon ko oont, gaaye, dunbe, ki qurbani ke sawab se nawaza jata hai. Taham, ye fazail qurbani ke makhsoos ahkam se mutaliq nahi balki Juma-ke-din ki haazri aur ibadat ki ahmiyat ko ujaagar karne ke liye hain.

Lihaza, musalmanon ko chahiye ke Juma-ke-din ki fazilat ko samjhein, iski tayari karein, aur waqt par masjid ja kar zyada se zyada ajar o sawab hasil karein. Allah-Ta’ala humein in a’maal ko anjam dene ki taufiq ata farmaaye jo is mubarak din ki barakaat aur razaye Ilahi ke husool ka zariya banen. Aameen!

Ahadees Ki Roshni Mein Juma Ki Fazilat

Hazrat Abu Huraira radiAllahu anhu se rewayat hai ke Rasool Kareem sallallahu-alaihi-wasallam ne farmaya:

Jis-ne Juma ke roz gusl-e-janabat kiya phir, (Juma ke liye) gaya, goya usne oont-ki qurbani-di, aur jo dusri sa,at mein gaya to goya usne gaaye ki qurbani di, aur jo teesri sa,at mein gaya to goya usne do seengon wale dunbe ki qurbani di, aur jo chouthi sa,at mein gaya to usne murghi raah-e-Khuda mein di, aur jo paanchwin sa,at mein gaya to goya usne anda raah-e-Khuda mein sadaqa kiya. Jab Imam (khutba ke liye) aa jaye to farishte bhi haazir ho jate hain aur ghour se zikr-e-Ilahi sunte hain."

Is hadees shareef mein jahan namaz-e-Juma ke liye masaajid mein haazri ki fazilat bayan ki gayi hai wahan un logon ke ajar o sawaab ki wazahat bhi hai jo Juma-ke-din masjid mein jaldi jate hain.

Allah Tabarak wa Ta'ala ka Nabi Akhir uz Zaman sallallahu-alaihi-wasallam ki ummat par ehsan azeem hai ke Juma jaisa babarkat din is ummat ko ata farmaya. Sahih Muslim mein Hazrat Abu Huraira radiAllahu-anhu se rewayat naql ki gayi hai ke Rasool Allah sallallahu-alaihi-wasallam ne farmaya:

"Hum sab se aakhir hain aur Qayamat ke din sab se saabiq honge, albata tamam ummaton ko hum se pehle kitaab di gayi aur humein unke baad kitab di-gayi. Phir-ye din (Juma) jis ko Allah Tabarak wa Ta'ala ne hamare liye muqarrar kar diya hai, Allah Tabarak wa Ta'ala ne humein hi is din ki hidayat di. Log is din mein hamare tabee hain. Yahood ne (Juma ke baad ka din) hafta muqarrar kiya aur Nasara ne uske baad ka din (Itwaar) ko (apne liye) muqarrar kiya."

Juma ke din Hazrat Adam alaihissalam paida huye, jannat mein aap ka dakhla bhi Juma ke din hua aur jannat se duniya mein aap ki tashreef aawri bhi Juma ke din hui. Aur hadees shareef mein ye bhi aaya hai ke jis behtareen din mein sooraj tulu hota hai wo Juma ka din hai.

To isi azmat ke peesh-e-nazar musalmanon ke liye ijtimaai ibadat ka din Juma rakha gaya aur is din namaz-e-Juma ke-liye masjid-main jaldi-aane ka sawab bhi bataya gaya. Hadees shareef mein jis pehli sa'at ka zikar kiya gaya ke us waqt aane wale-ko oont sadaqa karne ka sawab-milta hai, jumhoor fuqaha ke nazdeek is se muraad zawal ke baad pehla lamha hai, phir doosra lamha, phir teesra, choutha aur paanchwa lamha hai.

Juma Ke Din Ki Fazilat Ka Quran Aur Hadees Mein Bayan

Shuru mein padhi gayi hadees se kai masail wazeh hote hain. Ek baat to ye ke Juma ke-din gusl karna afzal aur mustahab hai. Kyun ke wuzu ki sunnat gusl se zyada taharat aur pakeezgi hasil hoti hai. Aur gusl janabat ka zikar kar ke is baat ki taraf ishara kiya gaya ke aisa gusl kiya jaye jaisa janabat ka gusl hota hai. Kyun ke jab gusl farz na ho to jisam ka koi hissa khushk bhi reh jaye to is mein koi harj nahi hota, lekin jab janabat ka gusl kiya jata hai to puri ihtiyaat se kaam liya jata hai aur koshish ki jati hai ke jisam ka koi hissa khushk na reh jaye. Hatta ke kulli-karna aur naak main pani chadhana bhi gusl mein farz hai. Agar ihtiyaat na ki jaye to mumkin hai jisam ka koi hissa khushk reh jaye aur yun gusl ki adai gi na ho. To Juma ke din agarche gusl farz ya wajib nahi, lekin Nabi Akram sallallahu-alaihi-wasallam ke irshad-e-girami mein is baat ki taraf ishara hai ke achi tarah gusl karein.

Is hadees shareef se ye baat bhi maaloom hui ke jo shakhs Juma padhne ke liye jitni jaldi jaye ga, usi qadar usay zyada sawab milega. Jaisa ke hadees mein janwar ki qurbani ka darja badarja zikar hua hai. Lihaza, Juma-tul-Mubarak ke din jab pehli azaan ho jaye to apne karobaar ko chhod kar zikr-e-Ilahi ki taraf jana zaroori hai. Quran-e-Majeed mein irshad-e-Khudawandi hai:

"Ay eemaan walon! Jab Juma-ke-din namaz ke liye azaan di-jaye to Allah ke zikr-ki-taraf daur pado aur tijarat ko chhod do. Ye tumhare-liye behtar-hai agar-tum jaante ho."

Lihaza, Juma ki azaan-e-awwal se tayari shuru kar ke jaldi se jaldi masjid mein pahunchna chahiye taake khutba-e-Juma se pehle deeni masail par mabni waaz o taqreer sun kar amali deeni maloomat hasil ki jayein aur sunnatein bhi apne waqt par padh kar Juma-tul-Mubarak ka Arabi khutba sunne ki sa'adat hasil ki jaye.

Khutba Ka Adab Aur Sawab

Jo log 'ain khutbe ke waqt ya is ke dauraan masjid mein aate hain, wo ek to hukm-e-Khudawandi ki khilaf warzi ke murtakib hote hain aur doosra nuksan ye hota hai ke nama-e-aamal mein mukhtalif janwaron ki qurbani ka sawab likhne wale farishte apne register ko lapait kar khutba sunne mein mashghool ho jate hain aur yun 'ain khutbe ke waqt ya is ke baad aane wale is sawab se mehroom reh jate hain. Agarche Juma-tul-Mubarak ki adai gi to ho hi jati hai.

Baaz hazraat ne is hadees se qiyas kiya ke murghi ki qurbani bhi jaiz hai, halan ke ye baat sarasar ghalat hai, kyun ke qurbani ke janwar mutayyan hain. Sahih Muslim mein Hazrat Jabir radiAllahu anhu farmate hain: ke "Sirf musinnah, yani ek saal ki bakri, do saal ki gaaye aur paanch saal ke oont ki qurbani karo. Haan agar mushkil ho to chhe saat mah ka dunba ya mendha zibh kar do."

Lihaza, qurbani ke liye teen qisam ke janwar mutayyan hain:

Oont

Gaaye, bhains waghera (nar aur madah dono shamil hain)

Bakri, bher, dunba (nar aur madah dono shamil hain)

Murghi ki qurbani ka qoul aisa qiyas hai jo ahadees ke khilaf hai. Aur is hadees mein to sirf Juma-tul-Mubarak ke din haazri dene walon ke liye sawab ka zikar hai, ahkam-e-qurbani ka bayan nahi hai. Agar murghi ke zikar se iski qurbani ka qoul kiya jaye to isi hadees ka agla hissa bhi dekhein:

(Jo paanchwin sa’at mein aaya goya usne anda sadaqa kiya.)

Yahan bhi "qarraba" ka lafz hai jo qurbani ke ma’ni mein aata hai. To kya yeh kaha jayega ke anday ki qurbani bhi ho sakti hai?

Khusul-e-kalam ye hai ke Rasool-e-Akram sallallahu-alaihi-wasallam apne "jawami’ ul-kalim" ke wasf se mawsoof hain. Aap sallallahu-alaihi-wasallam ki ek ek hadees mubarak masail aur ahkam ka azeem zakhira hai. Aur is hadees ka markazi mauzu Juma ke din haazri ki fazilat hai.

Allah-Ta’ala humein Juma ke din masajid mein jaldi se jaldi haazir ho kar zyada se zyada sawab hasil karne ki taufeeq ata farmaaye. Aameen!