Har jaaiz pakwan khana halal hai
har jaaiz khana khuwah Kitna hi qimti aur laziz ho uska khana halal hai Allah tala ne mumeneen ko hukm dete hue irshad farmaya ke ( tarjuma)
Aye imaan walon Khao hamari Di hui suthri chizen aur Allah ka ehsan Mano agar tum usi ki ibadat karte ho para 2 Surah Baqra aayat 172)
dusri aayat mein you farmaya ke (Khao aur piyo aur had se Na badho beshak had se badhne walon ko Allah Pasand Nahin farmata tum farmao kisne haram ki woh zeenat jo usne Apne bandon ke liye nikaali aur suthra rizq para 8 Surah Al araf ayat 32)
To in dono aayaton ka haasil e matlab yahi hai ki har jaiz gizaon aur pakwanon ko khana halal hai haan dusri aayat mein yeh farmaya Gaya ke Khao aur piyo aur israaf Na Karo to isi israaf ki aad lekar aksar aiteraaz Karne wale aaraishon aur pakwanon per aitraaz Karte rehte hain aur in zeenaton aur aaraishon aur umdah umdah nafees khanon ko israaf kehkar haram wa najaiz batate Hain isiliye ye israaf ke maani Hain aur mufassireen ne is aayat ki kya tafseer ki hai isko samajh Lena bahut zaruri hai
israaf kya hai
hazrat allama Syed Sharif Ali bin Mohammed jarjaani alaihirrahma apni mashhur kitab At.tarifat mein lafz israaf ki yah tarif ki hai ke (tarjuma) ghatiya maqsad mein bahut ziyada maal kharch kar dena At.tarifat Safa 18 misri)
hazrat allama Sharif alaihirrahma ne aur bhi kuchh Aqwal naqal kiye Hain magar khud Jo israaf ki tarif ki hai woh hi hai jo upar aapne padha
ab aap gaur kijiye ke umda libas aur nafees giza agar koi musalman is ala maqsad ki niyat se istemal kare ke umda libas se har jagah musalman logon khususan Jo Allah ko Nahin mante Hain unki nazron mein ba ruab wa muazzaz nazar aaega aur nafees giza is ala maqsad ki niyat se khae ke taqatwar hokar huquq Allah wa huqooq ul ibaad behtreen tariqe se Ada kare to aap khud hi faisla kijiye ke ismein israaf kahan paya gaya agar maqsad hasees aur ghatiya hota aur Maal ziyada kharch hota to us waqt israaf hota magar jab maqsad ala aur baland martaba hai aur is maqsad mein Kitna bhi ziyada Maal kharch ho jaaye israaf Nahin Hoga isliye israaf ka fatwa lagane walon par wajib hai ki woh pehle umda libas aur nafees khana istemal karne walon se yeh dariyaft kar len ke tumhara maqsad aur tumhari niyat kya hai uske bad israaf ka fatwa shadir Karen warna yad rakhiye ke bila wajah Kisi musalman par Kisi gunah ka ilzaam thop dena yeh khud hi bahut bada gunah hai
Ab mufassireen kiram ki tafseeron per bhi ek nazar Dal lijiye ki un buzurgon ne " la yuhibbul musrefeen" ki kya tafseer bayan farmai hai to allama Ibn Ahmad bin Mohammed saawi Alaihirremah ne apni tafseer mein ye farmaya ke israaf yeh hai ki tum Kisi halal ko hram thehrao jaise ki kuchh log gosht aur chiknai ko Mamnu samajhte hain ya tum Kisi haram ko halal thehrao ya khane peene mein israaf yeh hai ki tum itna ziyada kha lo ke woh muzir ho jaaye (Sawi aljalaa lain jild 2 Safa 66 matbua Mumbai)
beharhal khulasa e kalam yeh hai ke umda libas aur nafees khana agarche Kitna hi qimti ho musalman ke liye jaaiz aur halal hai ba sharte ke wih haram Na ho aur agar acchi niyat se umda libas aur nafees khana istemal karen to usko uski niyat ke muwafiq sawab milega hadees Sharif mein hai ki (tarjuma) "yani Aamal ke sawab ka daromadar niyaton per hai" Raha itna ziyada kha lena ki muzir ho jaaye to ismein nafees giza ki kya khususiyat hai agar koi ghatiya khana maslan bajri ka sattu bhi itna ziyada khale ke dast aane lage to yeh bhi israaf aur gunah ho jaega
mujhe ummid hai ki aap yeh baat aap samajh Gaye honge ki koi bhi tyohar mein koi bhi pakwan jo halal ho use ham banaa kar kha sakte hain aur usmein koi israaf Nahin hai •
Post a Comment