sone se pehle Allah ka zikr karo
assalamu alaikum jab ham raat ko sone lagen to sone se pehle kya karna chahiye aaiye iske bare main jante hain jab ham sare kaam kaaj aur khane pine se farig ho jayen raat ko aur sone jane lagen bister par to sab se pehle to wazu kar len aur phir dua quraan ki surah wagarah padh kar soyen .
huzur sallallahu alaihi wasallam sone se pehle aytal.kursi aur tinon qul shareef ki tilawat farma kar aaram farmate the
is main bhi azimush.shan hikmaten aur fawaid muzmir hain ilm.ul nafs ka ye mas.ala hai ke sone se pehle jo khyal insan ke dil main maujood ho woh khayal sari raat dil main mehfooz rehta hai us main nasho numa pata hai aur makhfi taur par dimag main asar dalta rehta hai chunanche ham dekhte hain ke koi mushkil mas.ala raat ko zehen main insan lekar so jaye to din ko wohi mas.ala bahut jald hal ho jata hai neez kai logon ne aazmaya hoga ke subah ko agar 4 baje uthna ho aur char baje uthne ka khyal insan dil main rakh kar so jaye to thik usko char baje jaag aajayegi uski nind khul jayegi
jo log sone se qabl ishq o mohabbat ki dastanen sunte hain ya gande navil padhte hain ya birhana tasaveer dekhte hain unko raat amuman shaitan se wasta padta hai neez aksar dekha gaya hai ke koi agar raat gam ki halat main soye to pelu badalne par woh sard aahen bharta rehta hai koi bachcha raat ko rote rote so jaye to aankh khulne par bhi woh chikhne lag jata hai aur agar woh khushi ki halat main so jaye to subah ko woh hansta hua uthta hai aur agar dudh pite pite so jaye to raat ko bhi honto ko hilate rehta hai aur ye sab umoor sabit karte hain ke sone se qabl jo insan ki dimagi ya jismani halat hoti hai wohi sari raat qaim rehti hai chunanche ham dekhte hain ke khuda ke pyare bande raat ko zikr e ilahi kar ke sote hain karwat badalne par bhi unki zaban par subhanAllah alhamdulillah ke kalmat hote hain isi liye quraan paak main farmaya gaya hai
(khuda ke bande bistar par bhi Allah ka zikr karte rehte hain ) pas agar insan in masnoon aayat ko padh kar unke mani v matalib par gaur karke so jaye to woh be shumar ruhani fawaid hasil kar sakta hai lihaza musalman ko chahiye ke rozana apne bachchon ko bhi shamil kar ke sone se qabl zikr e ilahi kar ke soyen insan ki ikhlaqi islah ke liye ye bhi ek nayab ilaj hai jo hamare nabi sallallahu alaihi wasallam ne hamen taleem farmaya hai .
Post a Comment