Shifa dene wala Allah tala hi hai
Har bimari ka ilaaj karna jaaiz hai yahan tak ke rasool Allah sallallahu alaihi wasllam ne farmaya ke aye Allah ke bandon tum log ilaj karo kyunki Allah tala ne har bimari ke liye shifa ka saman rakha hai shiway ek bimari ke ke woh la ilaaj hai aur woh budhapa hai (mishkat jild 2 safa 388 Ba hawala tirmizi wagaira)
dusri hadees mein hai ke huzur sallallahu alaihi wasallam ne irshad farmaya ke har bimari ki dawa hai jab bimari ko uski dawa pahunch jaati hai to Allah ke hukm se shifa ho jaati hai (mishkat jild 2 safa 387 Ba hawala Muslim)
in hadeeson se maloom hua ki ilaaj karna jaiz hone ke sath sath sunnat bhi hai isliye har bimari ka ilaaj karna chahie magar islam ka yeh buniyadi aqeedah har dam pesh rakhna lazim hai ki har bimari se shifa dene wala Allah tala hi hai dawaen shifa Dene Wali Nahin hain balki Allah tala ne dawaon ko shifa ka zariya banaa Diya hai yeh duniya alam e asbab hai jis Tarah is duniya ka koi kam bagair waseela aur zariya ke Nahin hota isi Tareeqe se shifa bhi dawaon ke wasile aur zariya se hasil hoti hain bal ke har kam ka karne wala aur shifa dene wala Allah tala hi hai chunanche Quran majeed ka irshad hai ke yeh aqeedah rakhna chahie ke (tarjuma) aur jab main bimar ho jaaun to wohi (Allah) mujhe shifa deta hai (para 19 Surah shora aayat 80)
shehad mein shifa hai
Allah tala ne shehad ke bare mein irshad farmaya ke is mein bimariyon se shifa hai baaz bimariyon ki to tanha shehad hi dawa hai aur baaz bimariyon mein dusri dawaon ke sath milkar ye ba hukme ilahi shifa deti hai chunanche ba kasrat khamiron majunon jawarishon mein shehad padti hai aur Baarha ka tajurba hai ki is se Shifa hasil Hoti hai chunanche Allah tala ka irshad hai ki (tarjuma) (shehad ki makkhi) ke pet se ek peene ki chiz rang birang ki nikalti hai jismein logon ki tandurusti hai beshak ismein nishani hai gaur o fikr karne walon ke liye para 14 surah nehal aayat 69)
fayda
mere elm mein duniya ki koi dawa aisi Nahin hai jiske bare mein quraan Majid mein yeh farmaya Gaya hoke ismein logon ke liye shifa hai sirf shehad hi ke bare mein Allah tala ne yeh farmaya hai isliye is per Iman lana farz hai ki shehad mein shifa hai jo iska inkar karega woh kafir ho jaega kyunki woh Quran ka munkir hai isliye beharhaal is per imaan rakhna zaruri hai ki shehad mein shifa hai
shehad Pina jaaiz hai
chunke Allah tala ne shehad ke bare mein yah farmaya ke yani shahad rang birang ki ek peene ki chiz hai isliye shahad ko bataure salan ke khana aur dusri dawaon mein milakar khana bhi jaaiz hai aur khali shahad ko peena bhi jaaiz hai
sharab haram hai
sharab aur jis dawa mein sharab Mili hui ho uska har har qatra najis aur uska Pina khana ya badan mein lagana usse ilaaj karna haram hai aur agar badan ya kapde mein lag jaaye to usko dhokar paak karna isi Tarah zaruri hai jis Tarah peshab aur khoon lag jaaye to usko dhokar paak karna zaruri hai Allah tala ne Quran majeed mein farmaya ke (tarjuma) sharab aur juaan aur but aur paanse napak hi Hain shaitani kam to inse bachte raho take tum falah paao (para 7 Surah maida aayat 90)
hadees Sharif mein Aaya hai ki rasool Allah sallallahu alaihi wasallam ne farmaya ke Allah ne bimari aur dawa donon ko nazil farmaya hai lihaza tum log dawa karo aur haram chizon se dawa Na Karo (mishkat jild 2 Safa 388) dusri hadees mein farmaya ke khabees (haram wa najis) dawaon se ilaaj karne ko rasool Allah sallallahu alaihi wasallam ne mana farmaya (mishkat jild 2 safa 388)
wazah rahe ke sharab ki hurmat qatai wa yaqeeni hai jo Quran majeed se sabit hai lihaza jo sharab ko haram naa maane Woh kafir hai aur jo sharab ko haram mante hue usko pita hai woh sakht gunahgaar wa faasiq hai aur us per is gunah se tauba karna farz hai
Post a Comment