Behtreen Insan Kaun Hai?

Doston, is post mein aap padhenge ke behtreen insan kaun hai aur bura insan kaun hai. Aksar log apne aap ko behtareen aur achha insaan samajhte hain, lekin hadees shareef ki roshni mein is sawal ka jawab alag hai. Aaiye, hadees ki roshni mein is baat ko samajhte hain.

Hadees Shareef Ka Paigham

Hazrat Abu Huraira RadiAllahu Anhu se marwi hai ke Rasool-e-Akram sallallahu-alaihi-wasallam kuchh bethe huye logon ke paas aakar khade huye aur farmaya:

"Kya main tumhe na bataun ki tum mein se kaun achha hai aur kaun bura?"

Logo ne khamoshi ikhtiyar ki. Aap sallallahu-alaihi-wasallam ne teen baar puchha. Phir ek shakhs ne arz kiya:

"Ya RasoolAllah sallallahu-alaihi-wasallam, bataiye ham mein se kaun achha hai aur kaun bura?"

Aap sallallahu-alaihi-wasallam ne farmaya:

"Tum mein se achha woh hai jis se bhalai ki umeed ho, aur tum mein se bura woh hai jis se bhalai ki umeed na ho."

(Mishkat Shareef)

Insani Zindagi Aur Imani Zimmedari

Insani zindagi ek muaashrati zindagi hai, jismein har shakhs ek doosre ka mohtaj hai. Ek Musalman ki imani aur akhlaqi zimmedari hai ke:

1. Dusron ki madad kare.

2. Aman aur sukoon faraham kare.

Rasool-e-Akram sallallahu-alaihi-wasallam ne un logon ko behtareen insan qarar diya jinse log achhe sulook ki tawqa karte hain. Aur woh shakhs jo shar aur fasad ka sabab bane, insaniyat ko khauf aur dehshat mein dale, usse bura shakhs aur koi nahi.

Achi Aur Buri Niyat Ka Asar

Ek aur hadees shareef mein farmaya gaya:

"Agar koi shakhs saum o salat ka paband ho, subah-shaam ibadat mein masroof rahe, lekin logon ko aziyat aur takleef pahunchaye, to woh jahannam ka mustahiq hai."

(Hadees)

Hazrat Abu-Huraira RadiAllahu-Anhu se marvi hai ke:

1. Ek shakhs ne arz kiya,

"Ya RasoolAllah sallallahu-alaihi-wasallam, falaan aurat ziyada namazon, rozon aur sadqe ke sath mashhoor hai, lekin apni zaban se padosiyon ko aziyat pahunchati hai."

Aap sallallahu-alaihi-wasallam ne farmaya:

"Woh jahannam mein jayegi."

2. Ek aur shakhs ne arz kiya:

*"Falaan khatoon kam namazon, rozon aur sadqe ke bawjood mashhoor hai, lekin woh apni zaban se kisi ko takleef nahi deti."*

Aap sallallahu-alaihi-wasallam ne farmaya:

"Woh jannati hai."

(Mishkat Shareef)

Nateeja Aur Paigham

Is hadees se saaf hota hai ke:

- Agar koi shakhs farz ibadat ke baad dusron ke saath achha sulook kare, to uska amal Allah ki baargah mein maqbool hai.

- Lekin jo shakhs logon ko aziyat de, chahe woh ibadat mein mashghool hi kyun na ho, Allah ko pasand nahi.

Aakhri baat

Doston, aapne samajh liya hoga ke behtareen insan woh hai jis se logon ko bhalai aur sukoon mile, aur bura insan woh hai jo logon ke liye khauf aur takleef ka sabab bane. Allah Ta’ala humein behtareen insaan banne ki taufeeq ata farmaye. Ameen!