Allah ke Zikr Mein Dilon ka Chain aur Sukoon Hai
Assalamu alaikum,
Dosto, aap title dekh kar hi samajh gaye honge ke yeh article kis par hai. Ji haan, main is mein Zikrullah yani Allah ke zikr ke bare mein batane wala hoon ke har haal aur har lamha humein Allah ka zikr karte rehna chahiye aur hamari zuban Allah ke zikr se tar rehni chahiye. Yeh bhi maloom hona chahiye ke Allah ke zikr ki badi fazilat hai aur woh aadmi bada khush-naseeb hai jo Allah ka zikr karta hai, kyunki jo Allah ka zikr karta hai Allah uska zikr karta hai. Qur'an mein hai:
"Tum mera zikr karo, main tumhara zikr karunga."
Yeh khush-naseebi hai uske liye jo Allah ka zikr karta hai. SubhanAllah!
Allah Ka Zikr Kaise Karen?
Doston, aapke zehan mein yeh sawal paida ho raha hoga ke humein Allah ka zikr kaise karna chahiye aur kis tarah zikr karen. Aaiye, iske tareeqe samajhte hain.
Zikr ki 3 qismen hoti hain:
1. Zikr Billisan (Zuban se Zikr Karna)
Yani zuban se Allah ka zikr karna jaise Allah Ta’ala ki tasbeeh, taqdees, hamd o sana, tauba, astaghfar, aur darood o dua karna. Maslan:
- Kalma Tayyaba padhna: La ilaha illallahu Muhammadur Rasoolullah.
- Kalma Shahadat padhna: Ash hadu alla ilaha illallahu wa ash hadu anna Muhammadan abduhu wa Rasooluhu.
- Zaban se subhanAllah, Alhamdulillah kehna, aur SubhanAllahi wa bihamdihi, SubhanAllahil azeem ka wird karna.
Huzoor alaihissalatu wassalam ne irshad farmaya:
"Afzal tareen zikr 'La ilaha illallah' hai."
Aur jo shakhs La ilaha illallah Muhammadur Rasoolullah ka wazifa banata hai, Allah usko 12 karamaton aur buzurgiyon se nawazta hai. Unmein se kuchh yeh hain:
- Islam ki halat mein duniya se uthaya jayega.
- Qabar roshan hogi.
- Meezan amal mein nekiyon ka palla bhari hoga.
- Pul Sirat par bijli ki tarah guzar jayega.
- Allah Ta’ala ka deedar naseeb hoga.
2. Zikr Bil-Qalb (Dil mein Zikr Karna)
Yani dil se Allah Ta’ala ki nematon ko yaad karna aur uski azmat, kibriyai aur qudrat par gaur o fikr karna. Yeh zikr insani dil ko mazboot aur Allah ke kareeb kar deta hai.
3. Zikr Bil-Jawareh (Azaa se Zikr Karna)
Yeh zikr insani jism aur uske jawareh ke zariye hota hai, jaise Allah ki qudrat ki nishaniyon par gaur karna. Misal ke taur par:
- Maa ki shafqat dekh kar Allah ki rehmat ko yaad karna.
- Pahadon ki balandiyan dekh kar Allah ki azmat aur badai samajhna.
- Faraiz aur ibadat ada karna.
Khulasa
Doston, Allah ka zikr ek aisi ibadat hai jo sirf dil ko sukoon aur chain hi nahi deta, balke insaan ko Allah ke kareeb le jata hai. Zikr ka har tareeqa insani zindagi mein barkat aur rahmat lata hai. Dua hai ke Allah humein har waqt aur har haal mein apne zikr ki taufeeq de aur apni rehmat se hamesha nawazta rahe.
Ameen.
Post a Comment