Mangni ka maamla hamare muashre mein bahut aam hai. Asal mein yeh sirf rishta tay hone aur dono khandanon ke razamand hone ka ek zariya hota hai. Lekin waqt ke saath is mein kai gair zaroori rasoom aur khurafaat shamil ho gayi hain jin ki wajah se shar’i aur akhlaqi kharabiyaan paida hoti hain. Is mazmoon mein mangni ki rasm ke mutalliq chand aham baatein bayan ki ja rahi hain taa ke log is maamle ko deen aur sharafat ke mutabiq samajh saken.
Mangni Ki Asal Haqeeqat
Mangni ki rasm۔ Yeh rasm fi nafsihi buri nahin hai۔ Is ki asal sirf itni hai ke ladke wale ladki ke ghar ke buzurgon se apne ladke ke liye un ki beti ya behen ka rishta maangte hain۔ Yahan tak to theek hai۔
Rasoom Mein Paida Hone Wali Buraiyan
Lekin jis tarah barsagheer Hind o Pak mein ise manaya jata hai us mein bahut si buraiyon ne jagah le li hain۔ Awwalan to ladki walon ke ghar itne zyada mehmaan le jaate hain jitne mein chhoti moti baraat ho jati hai۔ Yaqeenan yeh ladki walon par be-ja bojh hai۔
Tohfe Aur Angoothi Ka Masla
Is mauqe par ladka ya ladki ko kapron ka jora ya ladki ke liye hasb-e-haysiyat zewar tohfe mein de sakte hain۔ Lekin ladke ke liye sone ki angoothi maangna ya be-maange hi dena jaiz nahin۔ Kyunki sona mard ke liye pehenna ba-hukm-e-hadees haraam hai۔ Chandi ki angoothi bhi taqreeban chaar gram wazan ki ho، woh bhi ek nag wali hi ladke ko di ja sakti hai۔ Kyunki mard ke liye itna hi pehenna jaiz hai۔
Waqt-e-Zaroorat Kaam Aayegi Ka Jawab
Agar yeh kahen ke hum is liye de rahe hain ke waqt-e-zaroorat kaam aayegi۔ To arz hai agar baat yahi hai to aap se jitne ho saken sone ke sikke nazrana kar dijiye، woh zyada kaam aayenge۔
Huzoor Sallallahu Alaihi Wasallam Ki Narazgi
Huzoor Aqdas Sallallahu alaihi wasallam ne ek shakhs ko sone ki angoothi pehne dekha to us ki ungli se utaar kar phenk di۔ Aaqa Kareem Sallallahu alaihi wasallam ke us jagah se tashreef le jaane ke baad logon ne kaha bhi، ise utha lo، pehenna nahin bech ke kaam mein lana۔ To Sahabi ne kaha؛ jis cheez ko Rasool Allah Sallallahu alaihi wasallam ne phenka ho، main use utha nahin sakta۔
Mangni Ki Angoothi Pehnane Ki Rasm
Kai jagah is rasm mein sab se badi khabaasat yeh hoti hai ke ladka ladki ek doosre ko mangni ki angoothi pehnate hain۔ Yeh jaiz nahin۔ Yeh yaqini hai ke nikah se pehle woh dono ek doosre ke liye ajnabi hain، ek doosre ko chhoo nahin sakte۔ Is tarah duniya ke saamne ek doosre ko angoothi pehnana bilkul durust nahin۔ Bas zabani baat cheet kaafi hai۔
Khatma
Mangni ka maqsad sirf rishta tay karna aur dono gharanon ke darmiyan razamandi ka izhar hota hai۔ Is liye is mauqe ko saadgi، haya aur shar’i hudood ke andar rakhna chahiye۔ Ghair zaroori rasoom، dikhawa aur na-jaiz umoor se bach kar agar is maamle ko anjaam diya jaye to rishton mein barkat aur mohabbat paida hogi۔
