Islam duniya ka sabse qadeem o azeem mazhab hai jo apne daaman mein bohat si khoobiyaan aur achhaiyaan sametay hue hai. Iski misali khoobiyon ke aghyaar bhi mo'tarif hain. Isne apne mannay walon ko ek khushgawar nizam-e-hayat, behtareen dastoor-ul-amal aur qanoon-e-fitarat se nawaaza aur ek pur-aman, dilnawaz saleeqa-e-zindagi ata ki taake insaan apni masharti zindagi khoob achhi tarah guzaare. Islam ne hamesha afaal-e-qabeeha o mazmooma par rok lagayi aur deeni o dunyawi muamlaat mein tawazun barqarar rakhne ki talqeen o takeed ki.
Islam ki haqaniyat aur maujooda masail
Islam apni haqaniyat o sadaqat, khoobiyon aur achhaiyon ke bais international level par qadr o izzat ki nigah se dekha jata hai. Lekin aaj kal khud musalmano ne hi iski shabeeh bigaad kar rakhi hai. Zara dekhiye to sahi aaj ka muslim muashra kitna bigar chuka hai aur musalman kis dagar par chal raha hai, yeh kisi par makhfi o posheeda nahi hai.
Jahaiz ki rasam aur uski sangini
Aaj hamare muashre mein jahan mukhtalif qisam ki kharabiyan dar aayi hain, wahi ek badi kharabi yeh bhi paida ho gayi ke shaadi byah mein log jahez ki maang karte hain. Khasusan bike ki farmaish to pehle ki jati hai aur ab to hadd ho gayi ke larke wale naqd raqam ka mutaalba bhi karne lage hain jo shari'i nuqta-e-nazar se bilkul ghalat aur larki walon par beja zulm o sitam se kam nahi hai.
Afsos ki baat
Afsos sad afsos! Mazhab-e-Islam ne jin buraiyon ka khatma aaj se chaudah so saal pehle kar diya tha, taake har woh shakhs jo daaman-e-Islam se waabista hai, pursukoon zindagi guzaare, lekin ab to achhe khaase parhe likhe log bhi is se bari nahi hain aur na hi unka daaman saaf hai. Woh bhi behti Ganga ke dhaar par bahe ja rahe hain. Lihaza ab zaroori ho gaya hai ke in buraiyon par rok lagai jaaye taake har ameer o ghareeb ki bachiyon ki shaadiyan ba-asani ho saken.
Khaano aur takalluf ka bojh
Larki walon par tarah tarah ke lazeez aur pur-takalluf khano ka bojh bhi daalna kisi bhi zawiye-e-nigaah se durust nahi hai. Balke agar sahi dekha jaaye to larki walon ke yahan khana bhi nahi khana chahiye. Kash! Har koi sochta aur ghaur o fikr se kaam leta ke sab ke aage bachiyan hain. Kehte to sabhi hain aur in baaton par rona sabhi rote hain magar koi is par amali jama pehnaane ki koshish nahi karta. Illa ma sha Allah.
Islami taleemat aur hamari zimmedari
Alhamdulillah! Hum log musalman hain. Islami qawaneen o ahkaam hum logon ke liye hi hain. Madani Aaqa sallallahu ta'ala alaihi wa sallam ke ghulam hain. Hamein ghairon ki ghinoni tehzeeb aur unke aadaat o atwaar se hamesha ijtinab karna chahiye. Hamein shara' o sunnat par amal paira ho kar apni zindagi ko doosre logon ke liye bhi namoona-e-amal bana lena chahiye aur apne har kaam mein saadgi o sharaafat ka muzahira karna chahiye.
Ghairon ki naql se bachna
Ghairon ki aawara sohbat aur unki ghair tamadduni rawish apnane se door o nafoor rehna chahiye. Ikhlaqi ta'limaat ko hamesha madde nazar rakhna chahiye. Ghair Islami rasmon ko binaar-e-haqarat dekhna chahiye. Salaf o saliheen ke seerat-e-tayyaba se sabaq lena chahiye aur unki paakiza o muqaddas hayat mubaraka ko apne liye mash'al-e-raah-e-hidayat bana lena chahiye. Isi mein deen o dunya ki kamiyabi o bhalai hai.
Muashre ki islah ke liye tajweez
Muashra Islami ko shista, shaista, muhazzab aur paakiza banane ke liye muballigheen-e-Islam, qaum o millat ke ba-rasookh aur sarkarda hazraat ko chahiye ke woh apna qadam aage barhayein aur tamam khurafaat aur apne muslim muashre mein mojood aisi tamam kharabiyon ke sad-e-bab ke liye mo'assir iqdaam karein jin se qaum o millat mein iztiraab aur bechaini pai jaati hai.
