Kalma Tayyaba ka Zikr aur Uski Fazilat

Assalamu Alaikum Warahmatullahi Wabarakatuh

Aaj ki is post mein Kalma Tayyaba, yani "La ilaha illallahu Muhammadur Rasulullah" ke zikr ki fazilat kya hai, woh batane wala hoon. Waise to iski fazilat bahut zyada hai, lekin main sirf ek-do fazilat hi likhne mein ikhtifaar karunga.

Kalma Tayyaba ki Fazilat

1. Hazrat Abu Darda (Radi Allahu Anhu) ki Riwayat:

Huzur Nabi Kareem (Sallallahu Alaihi Wasallam) ne farmaya:

"Jo shakhs 'La ilaha illallahu Muhammadur Rasulullah' padhta hai, to uske munh se sabz rang ke parinde ki shakal mein ek farishta nikalta hai, jiske do par hote hain jo mashriq aur magrib tak pahunch jate hain. Woh dono par safed rang ke yaqoot aur motiyon se musajja hote hain. Phir woh apne un paron se upar ki taraf udne lagta hai aur Arsh-e-Mualla tak pahunch jata hai. Uski aawaz shehad ki makhi ki tarah hoti hai. Hamlin-e-Arsh (Arsh ko uthane wale farishte) use Allah ke Jah-o-Jalal ki wajah se upar jane se rokte hain. To woh kehta hai: 'Mujhe us waqt tak sukoon nasib nahi hoga, jab tak Kalma Tayyaba ka zikr karne wale ko bakhsh nahi diya jata.'

Allah Ta'ala farmata hai: 'Maine use bakhsh diya hai.'

Sath hi sath us farishte ko 70 zabane bhi ata kar di jati hain, aur uski har zaban Kalma Tayyaba ka zikr karne wale ke liye Qayamat tak astaghfar karti rahegi. Aur Qayamat ke din wahi farishta us zikr karne wale ko bazu se pakad kar Jannat mein le jayega."

*(Durratun Nasehin)*

2. Hadees Shareef:

Hazrat Ali (Radi Allahu Anhu) se riwayat hai, aapne farmaya:

**"Maine Nabi Kareem (Sallallahu Alaihi Wasallam) se suna, aap (Sallallahu Alaihi Wasallam) farmate the: 'Maine Sayyidul Malaika Jibraeel Amin (Alaihis Salam) ko suna, ke woh kehte the: 'La ilaha illallahu Muhammadur Rasulullah' ke jaisa jalil-ul-qadr koi kalma zameen par nahi utra. Isi ke sath saaton aasman, zameen, pahad, darakht, khushki aur tari qaim hai. Aur yahi kalma ikhlas hai, yahi kalma Islam hai, yahi qurba ilahi hai, yahi kalma sarapa taqwa hai, aur yahi kalma dozakh se nijat dene wala hai. Yahi woh kalma hai jise tarazu ke ek palre mein rakh diya jaye aur dusre palre mein saaton aasman aur saaton zameen rakh di jayen, to Kalma Tayyaba wala palra bhari hoga.'"**

*(Zubdatul Waizeen)*

Khulasa

In do riwayat se pata chalta hai ke Kalma Tayyaba ki kitni badi fazilat hai, aur jo iska zikr karta hai, uski kitni fazilat aur sawab hai. Allah Ta'ala hum sabko Kalma Tayyaba ka zikr karne ki taufiq ata farmaye. *Ameen.*

Kalma Tayyaba na sirf iman ki bunyad hai, balke yeh hamari roohani taraqqi aur akhirat mein nijat ka zariya bhi hai. Iski fazilat ko samjhein aur iska zikr apni zindagi ka hissa banayein.

*JazakAllah Khair!*