Milad Sharif Ke Baad Salam
Ahle Sunnat Wa Jamaat ka yeh mamool raha hai ke Mehfil e Milad Sharif ke ikhtitam par Huzoor Nabi Kareem Sallallahu Alaihi Wasallam ki bargah mein adab o mohabbat ke saath salam pesh kiya jata hai. Quran e Pak mein Ambiya e Kiram ke Milad ke tazkire ke saath un par salam ka bayan bhi maujood hai. Isi bunyaad par Ahle Sunnat Mehfil e Milad ke baad salam padhte hain aur apni mohabbat o aqeedat ka izhar karte hain.
Hazrat Yahya Alaihissalam Ke Milad Ke Baad Salam
Ahle Sunnat Wa jamaat ka mamool hai ke Milad Sharif ke bad Salam padhte Hain iski asal wa daleel bhi Quran e azeem mein maujood hai.
Allah Tala Ne Quran Majeed ki Surah Mariyam Mein Do Paigambaron ki Milad aur Unki paidaish ka tazkira Bayan farmaya Hai Ek Hazrat yahya alaihissalam ki Milad dusre Hazrat isa alaihissalam ki Milad.
Pahle to Hazrat yahya alaihis Salam ki paidaish ki khushkhabri phir Unki wiladat phir unke ausaaf ka tazkira farma kar Akhir Mein Allah Tala Ne farmaya ke:
“Aur Salam Ho un (yahya) per Jis Din woh Paida Hue aur Jis Din woh wafat Payenge aur Jis Din woh zinda uthae Jaenge” (para 16 Surah Mariyam aayat 15)
Hazrat Isa Alaihissalam Ka Apne Upar Salam Padhna
Isi Tarah Hazrat isa alaihissalam ki paidaish ka zikr farmaya ke Hazrat Mariyam alahis.salam Hamla huin phir Basti Se Bahar Ek Khajur ke darakht Ke Niche Dard e zah ki wajah se woh baith Gain aur Usi Jagah per Hazrat isa alaihissalam ne apni walida ki Paak daamani aur apni nubuwwat ka Elan farmaya.
In Sab tazkiron Ko zikr farmakar akhir Mein Hazrat isa Alaihis Salam ne apne Milad ke bad Khud Apne Upar Salam padha ke:
“Aur Mujh per Salam Jis Din Mein Paida Hua aur Jis Din wafat paaun Aur Jis Din zinda uthaya Jaaun” (para 16 Surah Mariyam Ayat 35)
Salam Ka Mazaq Udaane Walon Ke Liye Naseehat
Musalmanane ahlesunnat Jab Milad Sharif ke baad Salam padhte Hain To Kuchh be adab aur Gustakh log iska mazaq udate Hain.
Unhen Hosh Mein aa Jana chahie ki woh kis chiz ka mazaq Uda rahe hain kya Aayate khudawandi Sunnat e ilahiya aur Sunnat e isa alaihissalam ka mazaq Uda rahe hain.
Agar Maaz Allah Aisa Khayal Hai To unhen Apne Iman wa islam ki khabar Giri Karni chahie ke aisi be adbi aur gustakhi ke bad Unka Iman wa Islam baqi raha ya tabah wa Barbad Ho Gaya.
Magar sawal ye hai ke un Logon ke pass Iman wa islam tha bhi ya pehle Hi Se yeh Iman wa islam se Khali the.
Misl mashhur Hai Ki Izzat us Shakhs ki ki Jaati Hai Jo izzatdar Ho Aur Jiski Izzat Thi hi nahin to us per kitne hi Joote Barse uski izzat Kaise Jaaegi.
Mehfil e Milad Ke Baad Salam Padhna Quran Se Sabit Hai
To Bahar HAL Mehfil e Milad ki Majlis ho ya Jalsa Ho Uske bad Huzoor Nabi Kareem Sallallahu Alaihi vasllam ki bargah mein salato salam ka Nazrana pesh karna Salam padhna yeh Quran se sabit hai.
Isiliye Ham Ahle Sunnat Wa jamaat Jab Mehfil e milad ki Majlis ya Jalsa khatm Hota Hai to Mohabbat ke sath aur gulami Ka Suboot pesh karte hue adab Se padhte Hain:
Ya Nabi Salam Alaika
Ya Rasool Salam Alaika
Ya Habib Salam Alaika
Salawatullah Alaika
Ya ye padhte Hain Jo Sari Duniya Mein mashhur hai:
Mustafa Jane Rehmat Pe Lakhon Salam
Sham e bazm e Hidayat Pe Lakhon Salam
Khatma
Mehfil e Milad Sharif ke baad salam padhna Quran e Pak ki roshni mein Ambiya e Kiram ki sunnat aur Ahle Sunnat Wa Jamaat ka mamool hai. Yeh mohabbat e Rasool Sallallahu Alaihi Wasallam ka izhar aur bargah e Risalat mein aqeedat ka nazrana hai. Allah Ta’ala hamen Huzoor Nabi Kareem Sallallahu Alaihi Wasallam ki sachchi mohabbat aur adab naseeb farmaye aur salato salam ki barkaton se maalamaal kare. Aameen.
