kamzori door sehat mand hone ka raaz namaz main
Namaz aur sehat
namaz ek behtarin warzish (exercise) hai susti kaheli aur be amli ke is daur mein sirf namaz hi ek aisi warzish(exercise) hai ki agar usko Sahi tarike se padha jaaye To duniya ke tamam dukhon ka madawa ban sakti hai
namaz ek aisi warzish hai jo jismani aitbaar se na sirf beruni aaza ki khushnumai aur khubsurti Ka zariya Hai balki tibbi nuqta e nazar se andruni aaza maslan Dil gurde Jigar phephde dimag aanten maada reerh ki haddi gardan sina aur tamam qism ke glands ki nasho numa bhi karti hai aur Jism ko sadol aur khubsurat bhi banati hai ruhani taur per hamari rooh ko balidgi ataa karke quwwat bakhshti hai zehni v nafseyati bimariyon ka behtarin ilaaj hai neez zahiri aitbaar se
( jaisa ke namaz main qayam ruku sajda Qaida khas qism se Ada Kiya jata hai to inke fayede bhi khas hain)
qayam mein aajzi v inkesari paai jaati Hai magar Ruku mein qayam ki nisbat zyada aajzi Ka izhar hota hai aur sajda main ruku se bhi zyada ajzo inkesar paya jata hai kyunki ab insan apni Jabine niyaz ko bargahe khuda wandi mein pesh karte hue khak aalud karta Hai ISI Tarah aapne mahsus Kiya Hoga ke qayam ki tibbi v ruhani faide apni jagah magar ruku mein qayam ki nisbat zyada hikmaten mahsus hoti hain aur sajda ruku se bhi zyada rohani v jismani faide Ka ahaata kiye hue hai
Ab aaiye un bimariyon ke bare naam jante Hain jo namaz padhne se khatm ho jaati Hain
(1)dimagi Imraz
(2)aasabi Imraz
(3)nafsiyati imraz
(4)be sukooni depression aur becheni jaise Imraz
(5) Dil ke Imraz
(6) jodon ke Imraz
(7) uric acid se paida hone wale Imraz
(8) made aur ulcer ki shikayat
(9) sugar aur uske ma baad ke Asraat
(10) aankhon aur gale ki Imraz
Namaz aur yoga
musalman 24 ghanton mein 5 namazon ki adaigi mein farz sunnat aur nafil milakar kul 48 rakaat Ada karte hain jabki ek rakat mein kul 7 pose shaklen ikhteyaar ki jaati Hain is Tarah har musalman mard aurat baccha Buddha aur Jawan ek din ki panch namazon mein 7 mukhtalif shaklon ko 336 baar dohrata hai jabki ek namaz ki adaigi mein kam se kam 10 se 15 minute darkar hote hain aur agar sirf farz ho to 5 namazon mein kul 17 farz hote Hain is Tarah kam az kam 119 shaklen ek din mein ekhteyar ki jaati Hain
jab ek rakaat mein ekhteyar ki jaane wali in 7 shaklon ko Chand yoga chariyon se byan Kiya Gaya to unhone intehai hairat angez haqaiq Ka izhaar Kiya aur Kaha ke ye shaklen 84 yoga aasnon Ka mukhtasar tareen aasan tarin aur behtarin majmua Hain
yoga insan ki tamam rooh per havi Hai aur ek rakaat mein ekhteyar ki jaane wali yah 7 shaklen intehai takhliqi aur qudrati shaklen Hain aur agar yeh harkaat theek theek pure shaoor aur zahanat ke sath aur ek waza se dusri waza mein tabdeeli ahista ahista usool sharyat ke ain mutabiq ho to na sirf yeh har azu ko taazgi bakhshti Hai balki hamari ruh ko baleedgi ata karti hai use quwwat bakhshti hai
mukhtasar namaz mein jo fayda chhupa Hai unse be khabar hokar bhi agar namaz ka Amal jari rahe tab bhi wah majmui tor par insani zindagi ke behtar banane ki taraf apna Amal jari rakhti hai
sharyat mein namaz ki adaigi ke liye khushu aur khuzu per bahut zor Diya gaya hai khushu kya hai aur khuzu kya hai woh samajh len
Khushu andar ke sukoon dheyaan aur tawajja Ka name hai
Khuzu. Bahar ki tarteeb aur tawajja Ka name hai
namaz main in dono ke bare main takeed aai hai ke aap namaz main khushu aur khuzu ikhteyar Karen
Aur yoga main bhi yahi dono baton par ziyada tawajjo di jati hai
Jo baqaidgi ke sath 5 waqt ki namaz padhe to use yoga ki zaroorat hi Nahi padegi balke namaz hi se warzish exercise bhi ho jayegi aur bahut si bimariyon se chhutkara bhi milega aur insan ek sehat mand Zindagi jiyega
